අරාජිකවාදයේ රසායනය (තෙවන කොටස)

අරාජිකවාදයේ රසායනය (තෙවන කොටස)

නරඹන්නෝ, එකා පිට එකා වැටෙමින් දුවන්නට ඉගිළුනහ. ගිරිය යටින් කෑ ගසන තියුණු හඬක්ද වාතයේ පැතිර ගියේය. 

මේ මහ කළබලය දෙස මහාචාර්ය තුමා බලා සිටියේ, උඩඟු හසරැල්ලක් පාමිනි.

 “කරුණාකර අසුන් ගන්නා ලෙස මම ආයාචනා කර සිටිනවා" ඔහු කීවේය. 

"එසේම මම පෙර විස්තර කළ පරිදි, අත්පොළසන් නොදෙන ලෙසත් මම ඉල්ලා සිටිනවා. ඩයිනමයිට් ගැන ඇති ජනප්‍රිය මිථ්‍යා විශ්වාසයකුයි, මේ දැන් ඔබ විසින් පෙන්වා දුන්නේ. ඔබගේ ක්‍රියාවින්ම ඔබ පෙන්වා දුන්නා ඔබට ගනුදෙනු කිරීමට සිදු වී ඇති මේ ද්‍රව්‍යය පිළිබඳ පූර්ණ අවබෝධයක් ලබා ගැනීමට, මෙවැනි දේශනයක් කොතරම් වැදගත්ද කියා. මේ ඩයිනමයිට් කැටය සම්පූර්ණයෙන්ම හානි රහිතයි. මක්නිසාද, එය ඝණ ස්වරූපයේ පවතින නිසා. ඝණ ස්වභාවයේ පවතින ඩයිනමයිට් පුපුරා යන්නේ නැති බව - කැණීම් කරන අයවළුන් හා මේ සම්බන්ධව වැඩකරන උදවිය හොඳින්ම දන්න දෙයක්. තමන්ම පුපුරවා ගන්න යන අය, සාමාන්‍ය රීතියක් ලෙස, මෙම කැටය ගින්නක් අසල තබා, මෙලෙක් බවට පත් කර ගත යුතු ඒනිසයි. දැන් කාමරයේ තද උණුසුමෙන් ඔය කැටය දිය වෙන්නට පෙර කවුරු හරි කරුණාකර ඒක මට ගෙනත් දෙනවාද?”

එකෙක් හෙමින් ඉදිරියට පැමිණ, කැටය අවුලාගෙන, එය තම සිරුරෙන් හැකිතරම් ඈතින් තබාගෙන, පා ඇඟිලි මතින් මේසයට ලං වී, එය මහාචාර්ය තුමා ඉදිරියෙන් තැබීය.

"බොහොම ස්තුතියි" මහාචාර්යතුමා කාරුණික හඬකින් කීවේය. 

ඒ මිනිසා තම අසුනට යන අතර, දිග සැනසුම් සුසුමක් හෙලීය.

"ඒ ඝණ ඩයිනමයිට්" මහාචාර්ය තුමා දිගටම කතා කලේය. "මම කළින් සඳහන් කල පරිදි, එය ප්‍රායෝගිකව හානි රහිතයි. දැන් මා කැමතියි ඝණ නොවන ඩයිනමයිට් යොදාගෙන, ඉතා පුදුම සහගත පරීක්ෂණ දෙකක් පෙන්වන්න."

මෙසේ කියමින් ඔහු අර ලී කුඩු වැනි ද්‍රව්‍යයෙන් මිටක්, තමා ඉදිරියේ වූ කිණිහිරය මත හැළුවේය.

 

"ඔබ මේ පරීක්ෂණ දකින්නට ඉතාම සතුටු වෙයි, මොකද, ඩයිනමයිට් කොපමණ පහසුවෙන් හැසිරවිය හැකි දැයි මෙමඟින් පැහැදිළි වන නිසා. ගැස්සීම නිසා ඩයිනමයිට් පිපිරීමට ලක් වීම, නිතර සිදු වන අත්වැරැද්දක්. මෙතැන තිබෙන ඩයිනමයිට් ටික ප්‍රමාණවත්, මෙම ශාලාව සහ එතුල ඉන්නා පිරිස කුඩු පට්ටම් කරල නැත්තටම නැතිකරලා දමන්නට. එහෙම වුවත්, අපි බලමු ගැස්සීමකින් එය පිපිරෙයිද, නැත්ද කියා."

ඔහු කිණිහිරය මත තිබූ ද්‍රව්‍යය මතට, තද මිටි පහර දෙක තුනක් හෙලුවේය. ඉදිරිපස පෙල සිටියවුන් තම පසුපසින් සිටි සගයන් මතට තෙරපා හැරීමටත්, ඔවුනගේ රෝම කූප කෙළින් කිරීමටත් සමත් විය.

මහාචාර්ය තුමා, මිටි පහර දීම නවතා, යමක් වැරදී ගිය ආකාරයේ බැල්මක් හෙලීය. ඉන් අනතුරුව, කිණිහිරය මත තිබූ යමක් ඔහුගේ නෙතට හසු විය. ඔහු නැවී, යකඩය මත තිබූ එම ද්‍රව්‍යය හොඳින් පිරික්සන්නට විය.නැවත ඍජු ඉරියව්වට පැමිණි ඔහු, මෙසේ කියන්නට විය.

“මම මෙහෙම කියන එක, බියගුළු කමක් විදියට යමෙක් දකින්න පුළුවන්, නමුත්, මම මගේ අතින් සිදු වූ වැරැද්ද දුටුවා. මා අතින් තව පොඩ්ඩෙන් මහා විනාශකාරී දෙයක් සිදු වෙන්න ඉඩ තිබුනා. මට පෙනුනා කිණිහිරය මත ඉතා කුඩා ග්‍රීස් බින්දුවක්: මගේ මිටි පාරක් ඒක මත වැදුනා නම්, මේ වන විට ඔබ සැවොම මේ ගොඩනැගිල්ලේ සුන් බුන් වලට යට වෙලා, මරුවිකලෙන් දඟලනවා. කොහොම උණත්, ඉගෙන ගත් පාඩම වටිනවා.අර ග්‍රීස් බින්දුව, ඩයිනමයිට් වලින් බේරිලා වැටුනු නයිට්‍රොග්ලිසෙරීන් බින්දුවක්.මම කිව්වත් වගේ, ඩයිනමයිට් කිණිහිරයක් මත තබා තැලීම අන්තරාය රහිතයි. නමුත්, මිටි පාර නයිට්‍රොග්ලිසෙරීන් බින්දුවක් මත වැදුනොත්, එක මොහොතින් සියල්ල පුපුරා යනවා. මගේ සුළු අතපසු වීම ගැන මම ඔබෙන් සමාව ඉල්ලා සිටිනවා.“

මෙවිට, ශාලාව මැද කොටසින් එකෙක් නැඟී සිටියේය. ඔහු වෙව්ලමින් සිටි බැවින්, කට හඬ අවනත කර ගැනීමේ සුළු ප්‍රමාදයක් ඇති විය.ඔහුට කතා කළ හැකි වූයේ, කීප වරක් දිවෙන් කට වටා තෙත් කර ගත් පසුය.

තෙවන කොටස අවසානයි